ឯកឧត្តម ឃឹង សារ៉ាត់ អញ្ជើញអមដំណើរ ឯកឧត្តម ម៉ក់ ជីតូ កាត់ខ្សែបូសម្ពោធដាក់ឲ្យប្រើប្រាស់អគារសាលប្រជុំឃុំថ្មពូន ស្រុកកញ្ច្រៀច ខេត្តព្រៃវែង

ខេត្តព្រៃវែង ៖ នៅព្រឹកសៅរ៍ ១៥កើត ខែជេស្ឋ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៣ ខែមិថុនា ឆ្នាំ២០២៣ ឯកឧត្តម ឃឹង សារ៉ាត់ ប្រធានក្រុមការងារចុះមូលដ្ឋានឃុំថ្មពូន បានអញ្ជើញអមដំណើរ ឯកឧត្តម ម៉ក់ ជីតូ អនុប្រធានក្រុមការងារចុះមូលដ្ឋានស្រុកកញ្ជ្រៀច ជាតំណាងដ៏ខ្ពង់ខ្ពស់ ឯកឧត្តម សន្តិបណ្ឌិត នេត សាវឿន ប្រធានក្រុមការងារចុះ មូលដ្ឋានស្រុកស្វាយអន្ទរនិងស្រុកកញ្ជ្រៀច បានអញ្ជើញជាអធិបតីក្នុងពិធីកាត់ខ្សែបូ សម្ពោធដាក់ឲ្យប្រើប្រាស់អគារសាលប្រជុំគណបក្សប្រជាជនឃុំថ្មពូន ស្រុកកញ្ច្រៀច ខេត្តព្រៃវែង។
ពិធីសម្ពោធអគារសាលប្រជុំនេះ មានការអញ្ជើញចូលរួមពី លោក ឃិន ចាប ប្រធានគណៈកម្មាធិការគណបក្សប្រជាជនកម្ពុជាឃុំថ្មពូន, ឯកឧត្តម នេត វន្ថា អនុប្រធានក្រុមការងារចុះមូលដ្ឋានស្រុកកញ្ជ្រៀច, លោក សយ សុត ប្រធានគណបក្សប្រជាជនកម្ពុជាស្រុកកញ្ជ្រៀច និងក្រុមការងារសមាជិកសមាជិការជាច្រើនរូបទៀត។
ជាកិច្ចចាប់ផ្តើម ឯកឧត្តម ម៉ក់ ជីតូ អនុប្រធានក្រុមការងារចុះមូលដ្ឋានស្រុកកញ្ជ្រៀច បាននាំយកនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម នេត សាវឿន ដល់សមាជិកសមាជិកាគណបក្សប្រជាជនកម្ពុជាឃុំថ្មពូន។ ជាពិសេស គឺអ៊ុ ពូ មីង បងប្អូនកូនចៅដែលមិនបានអញ្ជើញមក សូមឲ្យមានសុខភាពល្អ អាយុយឺនយូរ សមប្រកបក្នុងមុខរបរ និងដើម្បីជាម្លប់ដល់កូនចៅរបស់យើងផង។ ចំពោះយុវជន យុវនារី នឹងក្លាយជាទំពាំងស្នងប្ញស្សី ដើម្បីបន្តវេនដល់ពុកម៉ែបងប្អូន ក្នុងការកសាងជីវភាពគ្រួសារ ក៏ដូចជាអភិវឌ្ឍន៍ក្នុងមូលដ្ឋាន ហើយអ្វីដែលសំខាន់នោះ គឺត្រូវគិតដល់សន្តិភាព បើគ្មានសន្តិភាពទេ គឺប្រៀបដូចជាប្រទេសអ៊ុយក្រែនអ៊ីចឹង ប្រជាពលរដ្ឋរស់នៅមានការលំបាក រងទុក្ខវេទនា រស់នៅដោយការភ័យខ្លាច។
ឯកឧត្តមអនុប្រធានក្រុមការងារចុះមូលដ្ឋានស្រុកកញ្ជ្រៀច បានបន្តថា បច្ចុប្បន្ននេះ កម្ពុជាមិនដូចមុនទេ គឺខ្មែរធ្វើបាន មានសន្តិភាព គឺមានការអភិវឌ្ឍន៍ អរគុណសន្តិភាព។ ថ្មីៗនេះ ក្រោមការដឹកនាំរបស់សម្តេចតេជោ ហ៊ុន សែន ក៏ដូចជាសម្តេចពញាចក្រី ហេង សំរិន និងវីរៈបុរស វីរៈជនរបស់គណបក្សប្រជនកម្ពុជា បានដឹកនាំកម្ពុជាយើងឆ្លងផុតពីការលំបាកគ្រប់បែបយ៉ាង ឈានដល់ការអភិវឌ្ឍលើគ្រប់វិស័យ ។ ដូច្នេះហើយ ក្រោមការដឹកនាំរបស់សម្តេចតេជោ នាយករដ្ឋមន្រ្តី ដែលបានអនុវត្តនូវគោលនយោបាយ ឈ្នះ ឈ្នះ ទើបធ្វើឲ្យយើងមានសុខសន្តិភាពដូចសព្វថ្ងៃនេះ។
ឯកឧត្តម ម៉ក់ ជីតូ អនុប្រធានក្រុមការងារមានប្រសាសន៍ថា រឿងដែលសំខាន់មួយទៀត មិនអាចបំភ្លេចបាននោះ គឺសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានធ្វើឲ្យពិភពលោកស្គាល់កាន់តែខ្លាំង គឺនៅលើពិភពលោកនេះ គ្មានប្រទេសណាមួយប្រឆាំងនឹងជំងឺកូវីដ១៩បាននោះទេ គឺមានតែប្រទេសកម្ពុជា តែដោយឡែកគោលនយោបាយរបស់រាជរដ្ឋាភិបាល ដែលមានសម្តេចតេជោជាគតិបណ្ឌិតដ៏ឈ្លាសវៃ នៅពេលធ្វើចតាឡីស័ក រាជរដ្ឋាភិបាលបានឧបត្ថម្ភសម្រាប់អាហារ៣ពេល ដើម្បីលើកទឹកចិត្តផងនិងព្យាបាលផង និងនៅក្នុងឆ្នាំ២០២២ បានទប់ស្កាត់ ប្រឆាំងជាមួយជំងឺកូវីដ-១៩ ដោយចាក់ស្រោចវ៉ាក់សាំងជូនប្រជាពលរដ្ឋ ។
ចុងក្រោយ ឯកឧត្តមអនុប្រធានក្រុមការងារ សូមថ្លែងអំណរគុណដល់គណៈអធិបតីនិងក្រុមការងារ អ៊ុ ពូ មីង បងប្អូនទាំងអស់ ដែលមានវត្តមាននៅទីនេះ ជាពិសេសគណៈកម្មការបក្សឃុំដែលបានរៀបចំបានស្អាតល្អ សូមសុខសប្បាយ មានសុភមង្គលក្នុងក្រុមគ្រួសារ អាយុយឺនយូរ កម្លាំងមាំមួន គឺជួបប្រទះពុទ្ធពរទាំង៤ប្រការគឺៈ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
សូមជម្រាបថា អគារសាលប្រជុំបក្សប្រជាជនឃុំថ្មពូន ស្រុកកញ្ជ្រៀច ខេត្តព្រៃវែង ត្រូវបានសាងសង់ជាថ្មីរួចរាល់ទាំងស្រុង ដែលជាអំណោយដ៏ថ្លៃថ្លាបំផុត របស់ ឯកឧត្តម នេត សាវឿន និងលោកជំទាវ សរុបជាទឹកប្រាក់សាងសង់ ចំនួន ៣១.៨០០ ដុល្លារអាមេរិក៕